ممبئی: بالی وڈ کے ’کنگ‘ شاہ رخ خان کے دیدار کیلیے ان کی رہائش گاہ منت کے باہر جمع ہونے والے مداحوں کے ساتھ افسوسناک واقعہ پیش آگیا۔
گزشتہ روز شاہ رخ خان کی 58ویں سالگرہ کے موقع پر سُپر اسٹار کی ایک جھلک دیکھنے کیلیے منت کے باہر سیکڑوں کی تعداد میں مداح جمع ہوئے جن میں سے کچھ کے موبائل فون چوری کر لیے گئے۔
ممبئی پولیس کے مطابق کم از کم 17 مداحوں کے موبائل فون چوری ہونے کی شکایت موصول ہوئی جس پر دو مقدمات درج کیے گئے۔ پولیس نے بتایا کہ مقدمات میں نامعلوم افراد کو نامزد کیا گیا۔
مقدمہ قومی اخبار کے 23 سالہ فوٹوگرافر کی شکایت پر درج کیا گیا جس نے بتایا کہ وہ 1 اور 2 نومبر کی درمیانی شب دوستوں کے ہمراہ منت کے باہر پہنچا جہاں مداحوں کی بڑی تعداد موجود تھی۔ ہجوم میں شامل چوروں نے ان کا موبائل فون جیب چوری کر لیا۔
فوٹوگرافر نے معلوم کیا تو پتا چلا کہ وہاں دیگر افراد کے موبائل فون بھی چوری کیے گئے جس کے بعد اس نے پولیس سے رجوع کیا۔
دوسرا مقدمہ 24 سالہ شہری کی شکایت پر درج کیا گیا جو گزشتہ رات منت کے باہر موجود تھا۔
ہر سال 2 نومبر کو شاہ رخ خان کے سیکڑوں مداح اپنے پسندیدہ اداکار کی سالگرہ کے موقع پر ان کا دیدار اور اپنی محبت کا اظہار کرنے کیلیے منت کے باہر جمع ہوتے ہیں۔
شاہ رخ خان جالی سے بنی بالکونی میں آکر مداحوں سے ملتے ہیں۔ اس موقع پر پولیس کی جانب سے سکیورٹی کے خصوصی انتظامات کیے جاتے ہیں۔
