لاہور: سابق وزیر اعظم و صدر مسلم لیگ (ن) شہباز شریف نے عام انتخابات کی تاریخ کا خیر مقدم کرتے ہوئے کہا کہ ہم تیار ہیں۔

شہباز شریف نے اپنے ایک بیان میں کہا کہ (ن) لیگ نواز شریف کی قیادت میں عوام کی عدالت میں جانے کو تیار ہے، واحد جماعت ہیں جس نے سب سے پہلے الیکشن کا عمل شروع کیا۔

سابق وزیر اعظم نے کہا کہ عوامی قیادت آئے گی تو عوام کی زندگی میں خوشحالی آئے گی، پارٹی کا الیکشن سیل، پارلیمنٹری بورڈز اور منشور کمیٹی کی تشکیل ہو چکی، یکم نومبر سے امیدواروں سے درخواستوں کی وصولی شروع کی جا چکی ہے۔

انہوں نے کہا کہ اللہ تعالیٰ نے موقع دیا تو ملک میں ترقی کا عمل پھر شروع کریں گے، 2018 میں ملک ترقی کی جس بلندی پر تھا اسی مقام پر واپس لائیں گے، ملک میں دوبارہ امن لائیں گے توانائی بحران کا خاتمہ ہوگا۔

ان کا کہنا تھا کہ بے روزگاری اور مہنگائی سے عوام کی جان چھڑائیں گے، نوجوانوں کی ترقی، کاروبار اور ہنرمندی کا دور پھر سے شروع ہوگا۔

شہباز شریف نے کہا کہ اسمبلی تحلیل کرنے والوں کو سپریم کورٹ نے ان کے جرم کی سنگینی بتا دی، 3 اپریل اور 9 مئی کے جرم کی سزا آئین و قانون کی سربلندی کا معاملہ ہے۔